နေရပ်မသေချာပေမယ့် အနေရပ်သေချာပါတယ်

တစ်ခုခုက၊ သို့မဟုတ် တစ်ယောက်ယောက်က သိပ်ကောင်းတယ်ဆိုရင် အသေကောင်းတယ်။ တစ်ခုခုက၊ သို့မဟုတ် တစ်ယောက်ယောက်က သိပ်ဆိုးတယ်ဆိုရင် အသေဆိုးတယ်။ တစ်ခုခုကို၊ သို့မဟုတ် တစ်ယောက်ယောက်က သိပ်ကြိုက်တယ်ဆိုရင် အသေကြိုက်တယ်။ တစ်ခုခုကို၊ တစ်ယောက်ယောက်က သိပ်ရွံတယ်ဆိုရင် အသေရွံတယ်။ တစ်ခုခုက၊ သို့မဟုတ် တစ်ယောက်ယောက်က အရမ်းမိုက်တယ်ဆိုရင် အသေမိုက်တယ်။ တစ်ယောက်ယောက်ကို အရမ်းချစ်တယ်ဆိုရင် အသေချစ်တယ်။ တစ်ယောက်ယောက်ကို အရမ်းမုန်းတယ်ဆိုရင် အသေမုန်းတယ်။

အရပ်ထဲမှာ အဲဒီလို ပြောလေ့ရှိတယ်။

အသေလှတဲ့သူ ဆိုတော့ အရမ်းလှတဲ့သူလို့ ထင်နေမှာ စိုးလို့နော်။ အသေလှတဲ့သူဆိုတာ အရမ်းလှတဲ့သူ၊ သိပ်လှတဲ့သူ၊ အင်မတန်လှတဲ့သူလို့ ဆိုလိုတာ မဟုတ်ပါဘူး။

အသေလှတဲ့သူဆိုတာ လှလှပပ သေတဲ့သူ၊ ကောင်းကောင်းမွန်မွန် သေတဲ့သူ၊ မြင့်မြင့်မြတ်မြတ် သေတဲ့သူ၊ ထူးထူးခြားခြား သေတဲ့လူလို့ ဆိုလိုပါတယ်။

မွေးဖွားလာတဲ့သူတိုင်း တစ်နေ့နေ့ တစ်ချိန်ချိန်မှာ ဧကန်မုချ သေကြရမှာဖြစ်လို့ နေ့စဉ်နဲ့အမျှ သတ္တဝါတွေ သေနေကြပါတယ်။ နေ့စဉ်နဲ့အမျှ ဆိုတဲ့နေရာမှာ နာရီနဲ့အမျှ၊ မိနစ်နဲ့အမျှ၊ စက္ကန့်နဲ့အမျှ ပါပဲ။ စက္ကန့်တိုင်း စက္ကန့်တိုင်း သတ္တဝါတွေ သေနေကြပါတယ်။ ငရဲ၊ တိရစ္ဆာန်၊ ပြိတ္တာ၊ အသူရကာယ်ဆိုတဲ့ အပါယ်ဘုံသားသတ္တဝါတွေဆိုတာ အသာထားလိုက်ဦး၊ ကိုယ်နဲ့ ဇာတ်ချင်းတူတဲ့ လူသတ္တဝါတွေကိုပဲ စက္ကန့်တိုင်း သေနေကြတာပဲ။

နိုင်ငံအနှံ့ ဖြန့်ပြီးတော့ ကြည့်လိုက်မယ်ဆိုရင် စက္ကန့်တိုင်း စက္ကန့်တိုင်း လူသားတွေ သေနေကြတယ်။ မြန်မာနိုင်ငံတစ်ခုတည်းနဲ့တွင် ကြည့်မယ်ဆိုရင်တော့ စက္ကန့်တိုင်းတော့ သေချင်မှ သေမယ်။ ဒါပေမဲ့ နေ့တိုင်းတော့ သေနေကြတယ်။

တခြားမြို့တွေဆိုတာ အသာထားလိုက်ဦး။ ရန်ကုန်မြို့ တစ်မြို့တည်းမှာကိုပဲ နေ့တိုင်း သေမနေကြဘူးလား။ သေနေကြတာပဲ။ တစ်နေ့တစ်ယောက်တောင် မကဘူး။ အယောက် သုံးလေးငါးဆယ်၊ တစ်ရာကျော်လောက်အထိကို နေ့တိုင်း သေနေကြတာ။

အခု ဒီစင်္ကာပူနိုင်ငံမှာလည်း နေ့တိုင်းနေ့တိုင်း လူတွေ သေနေကြမှာပါ။ စင်္ကာပူတစ်နိုင်ငံလုံးပေါင်းမှ ရန်ကုန်တစ်မြို့စာ လောက်ပဲရှိတယ်ဆိုပေမယ့် ရန်ကုန်မှာ နေ့တိုင်း လူတွေ သေရင် စင်္ကာပူမှာလည်း နေ့တိုင်း လူတွေ သေရမှာပေါ့။ အနည်းနဲ့ အများပဲ ကွာမှာပါ။

ဘယ်မြို့၊ ဘယ်ရွာ၊ ဘယ်နိုင်ငံလို့ မရည်ရွယ်ဘဲ အကြမ်းဖျင်းလေးပဲ ပေါ့ပေါ့ပါးပါး ပြောမယ်ဆိုရင် နေ့တိုင်း နေ့တိုင်း လူသားတွေ သေနေကြပါတယ်။

'နေ့တိုင်းနေ့တိုင်း လူသားတွေ သေနေကြတယ်' ဆိုတဲ့စကားလေးကို သေချာဥာဏ်သွင်းပြီးတော့ နာယူနေတယ်ဆိုရင် ဒီစကားလုံးတစ်လုံးတည်းနဲ့တွင်ကို  သံဝေဂဥာဏ် ရင့်သန်လာမှာပဲ။ စကားလုံးခံစားမှု အားကောင်းရင်ပေါ့။

'နေ့တိုင်းနေ့တိုင်း သတ္တဝါတွေ သေနေကြတယ်။ စက္ကန့်တိုင်း သတ္တဝါတွေ သေနေကြတယ်။ မိနစ်တိုင်း သတ္တဝါတွေ သေနေကြတယ်။ နာရီတိုင်း သတ္တဝါတွေ သေနေကြတယ်'

'နေ့တိုင်း နေ့တိုင်း လူသားတွေ သေနေကြတယ်။ နေ့တိုင်း နေ့တိုင်း ရန်ကုန်မြို့မှာ လူတွေ သေနေကြတယ်။ နေ့တိုင်း နေ့တိုင်း စင်္ကာပူမှာ လူတွေ သေနေကြတယ်'

ဒီစကားလုံးလေး ကြားလိုက်တာနဲ့ ဟိုက်ကနဲဆို စိတ်ကလေးက သံဝေဂလေးနဲ့ နွမ်းလျသွားမှာပဲ။ နွမ်းလျသွားတယ်ဆိုတာ တည်ငြိမ်လေးနက်သွားတာပါ။

တစ်ချို့က အရပ်ထဲမှာ ပြောလေ့ရှိကြတယ်။ 'သေစကားမပြောနဲ့' လို့။ 'သေ' ဆိုတဲ့ စကားလုံးပြောတာ မကြိုက်ကြဘူး။ 'သေ' စကားပြောရင် ကြောက်ကြတယ်။

'ငါတော့ သေသာ သေလိုက်ချင်တော့တာပဲ။ သေသွားရင် ကောင်းမှာပဲ။ သေသာ သေလိုက်ပါတော့။ သေမှပဲ ဝဋ္ဋ်ကျွတ်တော့မယ် ထင်ပါရဲ့'။ အဲဒီလိုပြောတဲ့ သေစကားမျိုးဆိုရင်တော့ နိမိတ်မရှိ၊ နမာမရှိ၊ ကျက်သရေမင်္ဂလာမရှိလို့ ပြောလို့ရတာပေါ့။

သူများကို 'ငါသေတာပဲကောင်းတယ်၊ ငါသေမှ နင်တို့သိမယ်။ နင်သေလိုက်ပါလား။ နင်သေချင်လို့လား။ နင်သေမှ အေးမယ်။ သေချင်းဆိုး' ဘာညာနဲ့ အဲဒီလို 'သေ' ဆိုတဲ့ စကားလုံးပြောမယ်ဆိုရင်တော့လည်း ကျက်သရေမရှိဘူးပေါ့။ မင်္ဂလာမရှိဘူးပေါ့။

ကိုယ့်ကိုယ်ကို မကျေနပ်လို့၊ သို့မဟုတ် သူတစ်ပါးကို မကျေနပ်လို့ ဒေါသ၊ ဒေါမနဿကို အခြေခံပြီး ပြောရင်သာ သေဆိုတဲ့ စကားလုံး မသုံးသင့်တာ၊ သေ ဆိုတဲ့စကား မပြောသင့်တာပါ။ အဲဒီလိုမဟုတ်ဘဲနဲ့....' နေ့စဉ်နဲ့အမျှ သတ္တဝါတွေ သေနေကြတယ်။ တစ်နေ့နေ့ တစ်ချိန်ချိန်မှာ သေကြရမယ်။ အချိန်မရွေး သေသွားနိုင်တယ်။ ကိုယ်ချစ်ခင်နှစ်သက်မြတ်နိုးတဲ့ ဘယ်သူဘယ်ဝါတွေလည်း သေသွားနိုင်တယ်။ တစ်နေ့ကျရင် သူအရင် သေရင်သေ၊ ကိုယ်အရင် သေရင်သေပြီးတော့ လမ်းခွဲကြရမှာပဲ'

.......စသည်အားဖြင့်ပေါ့လေ။ သေခြင်းတရားရဲ့ သဘော သဘာဝကို သံဝေဂဥာဏ်နဲ့ ဆင်ခြင်နှလုံးသွင်းတာ၊ သံဝေဂဥာဏ် အခြေခံပြီးတော့ သံဝေဂစိတ်ကလေးနဲ့ သေခြင်းတရားအကြောင်း ပြောတာဆိုရင်တော့ 'သေ' ဆိုတဲ့ စကားပြောတာ ကျက်သရေ မရှိဘူးလို့ ပြောလို့မရဘူး။ သံဝေဂဥာဏ်နဲ့ ပြောတဲ့ 'သေ' စကားဟာ တန်ဖိုးမဖြတ်နိုင်လောက်အောင် အင်မတန် ကျက်သရေမင်္ဂလာ ရှိပါတယ်။

သေခြင်းတရားအကြောင်း ဆင်ခြင်တာလောက် သံဝေဂဥာဏ် ထက်သန်စေတဲ့တရား မရှိတော့ဘူး။ သံဝေဂဥာဏ်ဖြစ်အောင် တွန်းအားအပေးဆုံးတရားကတော့ သေခြင်းတရားပဲ။ သေခြင်းတရားကို ဆင်ခြင်လို့ရှိရင် သံဝေဂဥာဏ်တွေ ထက်ထက်သန်သန် ဖြစ်နိုင်တယ်။ ထက်သန်တဲ့ သံဝေဂဥာဏ်က ဝိပဿနာဥာဏ်ကို မဂ်ဥာဏ်အထိ ဆိုက်သွားအောင် ကျေးဇူးပြုနိုင်တယ်။

ဒီနေ့ကတော့ သေခြင်းတရားအကြောင်း ဆင်ခြင်ဖို့ ဟောမှာ မဟုတ်ပါဘူး။ 'နေ့တိုင်းနေ့တိုင်း လူသားတွေ သေနေကြတယ်' ဆိုတဲ့ စကားလုံး ပြောနေရင်းနဲ့ စိတ်ထဲမှာ သံဝေဂသဘောလေး ခံစားရလို့ ဒီစကားလုံးပေါ်မှာ ဥာဏ်လေးစိုက်ပြီးတော့ သံဝေဂဥာဏ် ယူစေချင်လို့ နည်းနည်း နမူနာ ပြောလိုက်တာပါ။

လူတိုင်းလူတိုင်း သေမှာကတော့ သေချာပါတယ်။ 'နေရပ်' သာ မသေချာရင် ရှိမယ်၊ 'အနေရပ်' ကတော့ သေချာပါတယ်။

နေရပ်ကတော့ မသေချာဘူး။ အခုတရားနာပရိတ်သတ်တွေ အခုလောလောဆယ် စင်္ကာပူမှာ နေနေပေမယ့် တစ်သက်လုံး စင်္ကာပူမှာ နေဖြစ်မယ်၊ မနေဖြစ်ဘူးဆိုတာ မသေချာဘူး။ တချို့ မြန်မာပြည် ပြန်မယ်၊ တချို့ အမေရိကားသွားမယ်၊ တချို့ ဥရောပနိုင်ငံတွေ သွားမယ်၊ တချို့ အာဖရိကနိုင်ငံတွေ သွားမယ်၊ အခြေအနေ၊ အချိန်အခါပေါ် မူတည်ပြီး နေရပ်က အမျိုးမျိုး ပြောင်းလဲသွားနိုင်တယ်။

စင်္ကာပူနိုင်ငံသားအဖြစ် ခံယူပြီး စင်္ကာပူမှာပဲ တစ်သက်လုံး နေမယ်လို့ ဆုံးဖြတ်ထားတဲ့သူတွေတောင်မှ အကြောင်းအမျိုးမျိုးကြောင့် နေရပ်ပြောင်းသွားနိုင်တာပဲ။ မြန်မာပြည်မှာ ပြန်နေဖြစ်သွားတာ ရှိမယ်၊ တခြားနိုင်ငံတစ်ခုကို ပြောင်းနေဖြစ်သွားတာ ရှိမယ်။ နေရပ်က မသေချာဘူး။

နေရပ်က ဘယ်သူမှ မသေချာပေမယ့် အနေရပ်ကတော့ လူတိုင်း သေချာပါတယ်။ အနေရပ်ဆိုတာ သေတာကို ပြောတာပါ။ သေတယ်ဆိုတာ အနေရပ်သွားတာပဲလေ။ ဆက်တိုက် ဆက်တိုက် နေနေရာကနေ ဆက်မနေရတော့ဘဲ အနေရပ်သွားတာကိုပဲ သေတယ်လို့ ခေါ်တာပါ။

သေတယ်ဆိုတာ ဘာမှ အထူးအဆန်း မဟုတ်ပါဘူး။ မနေရတော့တာကိုပဲ သေတယ်လို့ ခေါ်တာပါ။ သေတာကိုပဲ အသက် ရှူရပ်သွားတယ်လို့ ပြောကြသလိုမျိုး အနေရပ်သွားတယ်လို့လည်း ပြောလို့ရပါတယ်။ လူတိုင်းလူတိုင်း တစ်နေ့နေ့ တစ်ချိန်ချိန်မှာ အနေရပ်သွားမှာကတော့ သေချာတယ်နော်။

'နေခြင်းမမြဲ၊ သေခြင်းမြဲ' ဆိုတာလိုပဲ နေရပ်မသေချာပေမယ့် အနေရပ်သေချာပါတယ်။ ဒါလေးကိုလည်း သံဝေဂအဖြစ်နဲ့ အမြဲသတိရပါ။ စိတ်ဓာတ်အင်အား ဖြစ်စေပါတယ်။ စိတ်ခွန်အား တိုးပွားစေပါတယ်။ အလုပ်များများပြီးဖို့ တွန်းအားကောင်းကောင်း ရစေပါတယ်။

သေခြင်းတရားကို သတိရတဲ့အလုပ်ဟာ စိတ်ဓာတ်ကျစေတဲ့ အလုပ် မဟုတ်ပါဘူး၊ စိတ်ဓာတ်တက်စေတဲ့ အလုပ်ပါ။ အလုပ် နှေးစေတဲ့အလုပ် မဟုတ်ပါဘူး၊ အလုပ်သွက်စေတဲ့ အလုပ်ပါ။

အရှင်ဆန္ဒာဓိက (အသေလှတဲ့သူ)