ဘာနဲ့တူလဲဆိုတော့ ရန်ကုန်မှာနေတဲ့ ပုဂ္ဂိုလ်တွေဟာ တောရပ် တောဒေသက တက်လာကြတယ်ဆိုပါစို့။
လယ်တွေ၊ ယာတွေ၊ ချောင်းတွေ မြောင်းတွေ အကုန်ရောင်းပြီး တက်လာကြတယ်။
ဘာလို့ တက်လာတာလဲဆိုရင် စီးပွားရှာဖို့ လာကြတာပေါ့။
ရန်ကုန်ရောက်တော့ ဘာပြောပြော ပါလာတဲ့ အရင်းအနှီးလေးနဲ့ သင့်တော်တဲ့ မြို့ထဲတစ်နေရာမှာ တိုက်ခန်းငှားနေပါတယ်။
တိုက်ခန်းက အောက်ထပ် မရဘူး။
ပထမထပ်ရတယ်။
လုပ်ငန်းကိုင်ငန်း ဈေးရောင်းလို့လည်း မရ။
ပါလာတဲ့ အထုပ်ကလေး ဖြေစား၊ ဖြေစား လုပ်နေရပါတယ်။
ဒါတင်မကဘူး။
ကြည့်လေ၊ စီးပွားရှာဖို့ နယ်ကလာတဲ့ လူတွေဟာ အောက်ထပ်က လက်ဖက်ရည်ဆိုင်၊ ဟိုဘက်က စားသောက်ဆိုင်၊ ဒီဘက်ဘေးက ကာရာအိုကေ၊ ဟိုဘက်ဘေးက TV Game ။
ကိုယ် ပါလာတဲ့ပိုက်ဆံတွေ အထုပ်ဖြေပြီး စားလိုက်သောက်လိုက် ပျော်လိုက်ပါးလိုက်နဲ့ အဲဒါနဲ့တင် စီးပွားမရှာဘဲ အချိန်ကုန်တော့ မွဲကုန်ပါလေရော။
မွဲလာတော့ မြို့ထဲက တစ်လကို တစ်သိန်းပေးရတဲ့ နေရာကနေ တစ်လကို ငါးသောင်းတန်လောက်ငှား၊ ငါးသောင်းကနေ သုံးသောင်းတန်လောက်ငှား၊ တဖြည်းဖြည်း မြို့လယ်ကောင်ကနေ ဟိုး....မြို့စွန်မြို့ဖျားက ဆင်ခြေဖုံး ရောက်သွားကြရတယ်။
နောက်ဆုံးတော့ ကျူးကျော်တဲ့ဆီ ရောက်သွားကြရတယ်။
မိမိတို့ လာတုန်းက ရန်ကုန်မှာ စီးပွားရှာဖို့ လာတာ၊ နယ်ကနေ စီးပွားဖြစ်ချင်လွန်းလို့ မြို့ကို တက်လာတာပါ။
အဲဒီလိုပဲ မိမိတို့ တစ်တွေလည်း သုံးဆယ်တစ်ဘုံကနေ လူ့ပြည်ဌာန လူ့လောကမှာ ကုသိုလ်စီးပွား လာရှာကြတာပါ။
ဟောဒီ လူ့ဘဝ ခန္ဓာကိုယ်ကြီးက အိမ်ငှားခန္ဓာကိုယ်ကြီးပါပဲ။
အဲဒါကို ကိုယ့်ကိုယ်ကိုယ် သေမင်းဆီက ငှားထားတယ်ဆိုတာ မသိလေတော့လေ ကြည့်စမ်းပါဦး.....။
ပျော်လိုက်ပါးလိုက် စားလိုက်သောက်လိုက်နဲ့ တကယ်လို့သာ မမတို့က အိမ်ငှား၊ အိမ်ငှားအနေနဲ့ ခန္ဓာကိုယ်ကြီး ငှားထားမှန်းသိရင် နောက် သုံးလနေရင် အိမ်ရှင်က ပြန်သိမ်းတော့မယ်။
မိုးယိုနေတဲ့ သွပ်မိုးကို အကုန်ခွာပြီး ပြန်မိုးမလား။
ခွက်လေးခံပြီး နေမလား။
စဉ်းစားပေါ့။
ကိုယ်မပိုင်လို့ အိမ်အမိုးကို အပြင်တော့ဘဲ ခွက်လေးခံပြီး နေမယ်။
ဒါဖြင့် မိမိတို့ ဒီခန္ဓာကိုယ်ကြီးကရော ခွက်လေးခံပြီး နေရုံ နေတာလား။
သွပ်ဟောင်းတွေကို ခွာပစ်ပြီး သွပ်အသစ်တွေ မိုးနေတာလား၊ ပြန်ကြည့်ကြစေလိုပါတယ်။
ဓမ္မဒူတ ဒေါက်တာ အရှင်ဆေကိန္ဒ (အရှုံးထဲကအမြတ်)
No comments:
Post a Comment