တစ်ခါတုန်းက ဗာရာဏသီမင်းတစ်ပါးဟာ နွေရာသီစံနန်းတော်မှာ နေနေပါတယ်။ အဲဒီအချိန်မှာ ဗာရာဏသီမင်းရဲ့အနားမှာ မောင်းမတစ်ယောက်က စန္ဒကူးနံ့သာ သွေးနေပါတယ်။ နံ့သာသွေးနေတဲ့ မောင်းမရဲ့ လက်တစ်ဖက်က လက်ကောက်တစ်ကွင်း၊ တစ်ခြား လက်တစ်ဖက်မှာက လက်ကောက်နှစ်ကွင်း ရှိနေပါတယ်။
နံ့သာသွေးနေတာဆိုတော့ လက်ကောက်နှစ်ကွင်းရှိတဲ့လက်က လက်ကောက်နှစ်ခုအချင်းချင်း ထိခိုက်ပြီး မြည်မြည်နေပါတော့တယ်။ လက်ကောက်တစ်ကွင်းပဲရှိတဲ့ လက်တစ်ဖက်ကတော့ မမြည်ပါဘူး။
ဗာရာဏသီမင်းက လက်နှစ်ဖက်ရဲ့ တုန့်ပြန်ပုံ မတူတာကိုမြင်ပြီး " လက်ကောက်တစ်ကွင်းထဲ ၀တ်ထားတဲ့ လက်ကမမြည်ဘူး။ နှစ်ကွင်းဝတ်ထားတဲ့ လက်ကျတော့ မြည်နေတယ်။ ဒီအတူပဲ လူတွေက အပေါင်းအဖော်နဲ့ နေနေရင် မကျေနပ်မှုတွေ ထိခိုက်မှုတွေ ဖြစ်နေမှာပဲ။ တစ်ယောက်ထဲ နေနေရင်တော့ မကျေနပ်မှု၊ ထိခိုက်မှုဆိုတာ ရှိမှာ မဟုတ်ဘူး " လို့ နံ့သာသွေးနေတဲ့ မောင်းမမိဿံကို တစိမ့်စိမ့်ကြည့်ရင်း တွေးနေတဲ့အတွေးကို ထပ်ကာထပ်ကာ ဆင်ခြင်နေပါတော့တယ်။
ဗာရာဏသီမင်းက မြင်ကွင်းကိုကြည့်ပြီး ဆင်ခြင်နေတဲ့အချိန်မှာ အနားမှာ ရွှေတွေ၊ စိန်တွေ ညွတ်နေအောင် ၀တ်ထားတဲ့ မိဖုရားကြီးကလည်း ရှိနေပါတယ်။ မိဖုရားကြီးက ဒါကို ဘယ်လိုတွေးသလဲဆိုတော့ " မင်းကြီးတော့ မောင်းမငယ်ကိုကြည့်ပြီး ချစ်စိတ်တွေဖြစ်နေပြီထင်တယ်။ မဖြစ်ဘူး၊ မဖြစ်ဘူး ငါကိုယ်တိုင်သွေးမှပဲ " ဆိုပြီး မောင်းမငယ်ကို ဖယ်ခိုင်းပြီး ကိုယ်တိုင်ဝင်သွေးပါတော့တယ်။
မိဖုရာကြီးရဲ့လက်မှာ လက်ကောက်တွေက အများကြီးဆိုတော့ အသံက " ချွင်း......ချွမ်း၊ "" ချွင်း......ချွမ်း"
ဆိုပြီး ရှေ့ကထက် ပိုမြည်နေပါတော့တယ်။
အရင်ထက် သုံးလေးဆပိုမည်လာတဲ့ လက်ကောက်သံကြောင့် မင်ကြီးလည်းပိုပြီး ငြီးငွေ့သံဝေဂ ဖြစ်သွားပါတယ်။
ဒါကြောင့် ငြီးငွေ့သံဝေဂစိတ်ကို အခြေခံပြီး နေရာမှာတင် ခန္ဓာဉာဏ်စိုက်ပြီး ၀ိပဿနာရှုလိုက်တာ ပစ္စေကဗုဒ္ဓါဖြစ်သွားပါတယ်။
မင်းကြီး ၀ိပဿနာပွားများလို့ ပစ္စေကဗုဒ္ဓါဖြစ်သွားတဲ့အချိန်မှာ မိဖုရားကြီးကလည်း နံ့သာသွေးပြီးလို့ မင်းကြီးကို နံ့သာလိမ်းဖို့လျှောက်ပါတယ်။ ဒီတော့ မင်းကြီးက " ငါမင်းမဟုတ်တော့ဘူး၊ ပစ္စေကဗုဒ္ဓါဖြစ်သွားပြီ၊ နံ့သာမလိမ်းတော့ဘူး " လို့ ပြန်ပြောပြီး မိဖုရားအပါအ၀င် အမတ်အားလုံးကို တရားဟောပါတယ်။ တရားဟောပြီးတော့ ဟိမ၀န္တာနန္ဒမူလိုဏ်ကို ကြွသွားပါတော့တယ်။
(သုတ္တနိပါတ်အဋ္ဌကထာ၊ ခဂ္ဂ၀ိသာဏသုတ်။ နှာ - ၈၅)
ရွှေလက်ကောက်တွေရဲ့ ရိုက်ခတ်သံတွေကို လူတိုင်းနီးပါး ကြားဖူးနေကြတာပါပဲ။ ကြားဖူးတဲ့သူတိုင်းလည်း သံဝေဂဖြစ်ပြီး တရားထူး တရားမြတ်တွေရမသွားကြပါဘူး။ ဒါက ပါရမီနဲ့ဆိုင်သွားပါပြီ။
ပါရမီပြည့်ပြီးတဲ့သူတွေကတော့ သက်ရှိတွေရဲ့ ဖြစ်စဉ်မှတင် မဟုတ်ပါဘူး။ သက်မဲ့တွေရဲ့ ဖြစ်စဉ်တွေကိုပါ ကြည့်ရင်း သံဝေဂဉာဏ်ဖြစ်ပြီး ၀ိပဿနာတရားအားထုတ်ရင်း တရားထူး တရားမြတ်တွေ ရသွားတတ်ကြပါတယ်။ တရားထူး တရားမြတ်ရသွားတဲ့ သာဓက၀တ္ထုတွေလည်း စာထဲမှာ တော်တော်တွေ့ရပါတယ်။
ပါရမီပြည့်နေတဲ့ အရှင်မြတ်တွေ သံဝေဂဉာဏ် ဖြစ်သွားတဲ့ သက်ရှိသက်မဲ့ဖြစ်စဉ်အာရုံတွေက အားလုံး နေ့စဉ်တွေ့နေရတဲ့ မြင်ကွင်းတွေပါ။
" ဆင်ခြင်တဲ့ သံဝေဂဉာဏ်ဟာ ၀ိပဿနာဉာဏ်၊ မဂ်ဉာဏ်ဖိုလ်ဉာဏ်အတွက် အထောက်အပံ့ဖြစ်တယ် " ဆိုတဲ့ အသိလေးကို ရင်ထဲထည့်ပြီး ကိုယ့်ဝန်းကျင်က သက်ရှိ သက်မဲ့ သဘာဝဖြစ်စဉ်လေးတွေကို သံဝေဂယူရင်း ဆင်ခြင် ဆင်ခြင် သွားဖို့ပါပဲ။
စိတ်သဘောထား မမြင့်မြတ်တာ၊ ကိုယ်ကျိုးပဲ ကြည့်တာ၊ သေဆုံးသွားတာ၊ သစ်ရွက်ကလေးတွေ ကြွေကျသွားတာ၊ ပန်ကလေးတွေ ညှိုးသွားတာစသည်ဖြင့်ပေါ့။
ဆင်ခြင်ရင်း ဆင်ခြင်ရင်းနဲ့ သံဝေဂဉာဏ်လေးတွေ များလာပါလိမ့်မယ်။ မဂ်ဉာဏ်ဖိုလ်ဉာဏ် မဖြစ်သေးရင်တောင် အနုစား ၀ိပဿနာဉာဏ်ဖြစ်ဖို့အတွက်တော့ အများကြီးအထောက်အကူ ဖြစ်သွားမှာပါ။
ရဝေနွယ်(အင်းမ) (ဖြစ်ပြီးတဲ့အကုသိုလ်ကို ဘယ်လိုပယ်မလဲ)
No comments:
Post a Comment